Asylmottak Kvardagen i eit asylmottak

Vaksne asylsøkjarar har krav på norskopplæring, og målet er at dei skal lære seg nok norsk til å klare seg mest mogleg på eiga hand. Barn og unge som sannsynlegvis vil bli verande i mottaket i meir enn tre månader, har rett og plikt til grunnskuleopplæring.

Ungdommar mellom 16 og 18 år har rett til undervisning i norsk og samfunnsfag og kan også ha rett til undervisning i grunnskulefag.

Bebuarar som har dokumentert identiteten sin, kan søkje om rett til arbeidsløyve for asylsøkjarar og har dermed høve til å jobbe. Nokon får også yrkeskompetanse på denne måten.

Alle som bur i mottak skal igjennom eit informasjonsprogram om det norske samfunnet og verdiane det byggjer på.

Informasjonsprogrammet tek for seg 

• asylprosessen 
• livet i mottaket 
• lokalmiljøet 
• helse 
• konfliktførebygging 
• lover og lovbrot 
• busetjing i ein kommune (eksternt nettsted)
• retur til heimlandet (eksternt nettsted)

Alle mottaka tilbyr ulike fritidsaktivitetar, og bebuarane organiserer også fleire aktivitetar sjølv. Mange av bebuarane deltek også i frivillig arbeid i mottaket.

Asylmottaka samarbeider ofte med det lokale idrettslaget, og andre lokale lag og foreiningar. Det er mange av bebuarane som vel å delta i aktivitetar for barn, for eksempel leksehjelp. Då får barna hjelp med skulen og dei frivillige får vere med i eit sosialt nettverk.